BALLANTII BUUNDADA JABAN IYO NUUNIHII JECEYLKA

BALLANTII BUUNDADA JABAN IYO NUUNIHII JECEYLKA

Qian Fenxiang waxay leedahay uur weyn—oo waxaa soo dhow ajasheedii. Qian, waxaa heysa cabsi, kama baqayso dhalidda ama xanuunka foosha, balse waxay ka baqaysaa dawladda, sababtoo ah Shiinaha ma ogola in qoysku uu dhalo hal cunug ka badan. Qian iyo gabadheeda 3 jirka ah waxay ku dhuunteen gurI-doon webiga dul heehaabaya—si ey cunugeeda labaad ugu dhasho. Lix usbuu kadib waxay dhashay gabadh.

Xu Lida oo ah sayga Qian, ayaa ka dhaliyay, mandheerta ayuu ku jaray maqas guri aan aheyn kan dhaqaatiirta isticmaalaan, waxwalba waxay ku socdeen sidey qorsheeyeen, ilaa ibidii ey soo dhici weyday. Waana khatar weyn oo suurtagal ah in hooyadu u dhimato haddaan ibida lasoo ridin. Isbitaal ma tagi karaan, oo waxay ka baqayaan in la ciqaabo. Nasiibwanaag, waxaa ka ag dhowaa xarun caafimaad oo gaar loo leeyahay. Xaruntii ayey isku biimeeyeen. Dhaqtarkii xarunta joogay ayaa la tacaadhufay xaaladda banii’aadannimo oo ey ku jiraan qoyskaan, wuxuuna aqbalay inuu hooyada badbaadiyo, dawladdana uusan u sheegin.

Shan maalmood kadib, Xu wuxuu kacay hiirta waaberi, wuxuuna u qubeeyay gabadhiisa shanta maalmood jirta, wuxuu siiyay caano—dhar nadiif ahna wuu usoo xiray. Gabadhii wuxuu kusoo riday salad—wuxuuna ula soo dhaqaaqay suuq khudaarta lagu iibiyo oo aad saxmad u ah, kuna yaalla magaalada Suzhou. Hareeraha ayuu iska eegay, si aayar ah ayuu dhulka u dhigay, wuuna kasoo ruqaansaday. Sallada dhinaceeda wuxuu geliyay warqad ey ku qornaayeen erayadaan:

“Gabadhayada Jingzhi, waxay dhalatay 10ka aroornimo, 24kii bishii todobaad ee sanad dayaxeedka 1995kii. Saboolnimo iyo siyaasadaha dunida ayaa nagu qasbay inaan gabadheena xoorno. Si kastaba ha ahaatee, waxaan rajo-dhowreynaa quluubta aabayaasha iyo hooyooyinka sokeeye iyo shisheeye. Ku mahadsanid inaad badbaadisay gabadhayada, aadna aqbashay inaad daryeeshid. Haddii samooyinku ey leeyihiin dareen, nasiibkuna uu markale na kulansiiyo, waxaa inoo balan ah kulanti danbe—oo—aan ku kulanno Buundada Jaban ee Magaalada Hangzhou, aroornimada maalinta ey Qixi [waa magaca kale ee gabadha yar] ey 10 jirsato ama 20 jirsato.” Ayuu fariintiisa kusoo gabagabeeyay Xu.

Maalinta jeceylka ee Shiinaha ayaa loogu magacdaray, maalinta dabaaldagga Qixi, taas oo ku began maalinta 7aad ee bisha 7aad ee sanad dayaxeedka Shiinaha, waxayna sidoo kale ku beegan tahay maalinta lo’ jire iyo jeceylkiisa loo ogolaaday iney buundada jaban isku arkaan.

Nuune Jingzhi iyo farriintii saladdeeda ku jirtay waxaa la geeyay xarunta agoomada ee magaalada Suzhou—halkaas oo lagu daryeello caruurta aan cidna heysan. Xilliyadaas waxaa xarunta soo booqday lamaane Mareykan ah oo raadinaya nuune ey koriyaan, lamaanahaan oo lagu magacaabo Ken iyo Ruth Pohler oo ka yimid degmada Hudsonville, ee gobolka Michigan. Waxay lamaanaha yiraahdeen:

“Ma aanan kala jecleyn waddanka uu u dhashay cunuga aad doonayno inaan korsano, balse, waxaa na dhiirigelisay seedigeen oo Shiineys ah, iyo xaaskayga Ruth walaasheed oo horay ilmo Shiineys ah u korsatay.” Ayuu yiri Ken, oo ah aabe dhalay laba wiil—kaas oo doonayay ilmo seddexaad.

Gabadhii yareed iyo farriintii la socotay ayey soo qaateen, fariinta waxay tuseen haweeney turjumaan ah si ey ugu fasirto waxa warqadda ku qoran. Ken wuxuu yir: “dareenka tarjumaanadda ayaa aad u kacay markey bilowday akhriska warqadda, weyna ilmeysay. Fariintu waxay aheyd mid qalbiga lushay.” Lamaanaha waxay go’aansadeen ineysan Kati (waa magaca cusub ee Jingzhi ey ula baxeen) u sheegin sidey kusoo heleen ilaa ey 18 ka gaadho.

Kati waxaa lagu soo koriyay nolol aad u wanaagsan, waxayna heshay waxwalba oo ey nolosheeda u baahan tahay, caafimaad, waxbarasho, laba waalid oo jecel—kuwaas oo isku si u koriyay iyada iyo labada wiil ee dhabarkooda kasoo go’ay. Kati, markey weynaatay waxay bilowday jaamacad, halkaas oo ey ku daraaseenayso caafimaadka dadweynaha iyo muyuusikada. Kati oo ka warramaysa koriinkeeda waxay tiri: “waxaa la igu soo koriyay nolol caruurnimo oo fadhida, in la isoo korsaday qofwalba wuu ogaa, sidaas aawadeed qofna ima weydiin jirin asalkeyga”.

Dhanka kale, Qian and Xu, labada waalid ee dhalay Kati, waxay kusoo koreen tuulada Baoying ee u dhow magaalada Yangzhou ee gobolka Jiangsu. Xu iyo jeceylkiisa Qian waxay is jeclaayeen caruurnimadooda. Xu, markuu dhammeeyay dugsiga sare wuxuu aaday magaala Hangzhou si uu u shaqaysto. Xu oo xilligaas 16 jir ahaa shaqada kaliya uu helay waxay noqotay inuu alaabaha burburay ee guryaha lagu isticmaalo uusoo uruuriyo. Markuu dhowr sanandood  u dhabar adeegay shaqadaas adag—uuna uruursaday xoogaa lacag ah, ayuu wuxuu kusoo laabtay tuuladiisii si uu ula midoobo lamaanihiisa Qian oo ey ilaa yaraantii is jeclaayeen. Lamaanaha waxay buul yar ah ka dhisteen xero ey ku nool yihiin qaxootiga xamaalatada—taas oo ku taal duleedka magaalada Hangzhou. Waxay aad uga fogaayeen isbitaalada iyo xarumaha caafimaadka, markii Qian ey fool qabatay, Xu wuxuu kusoo kaxeeyay baaskiilkiisa isagoo soo jaray kiilo mitiro badan si uu u geeyo isbitaal ey ku dhasho. Qian waxay dhashay gabadhooda curadka ah taas oo loo bixiyay Xiaochen.

Niyad wanaagooda aawadeed, waxaa ku dhalatay iney gabadhooda Xiaochen u dhalaan walaal ey wehelsato. Xu wuxuu yiri: “waxaan is niri waad ka baxsan kartaan sharciga Shiinaha ee aan ogoleyn dhalidda hal cunug ka badan. Sababtoo ah waxaan ku nooleyn xero qaxooti oo aad uga fog xarrumaha dawladda. Si kastaba ha ahaatee, waxay si dhaqsiyaha u barteen arxan-darrada xukuumadda. Sharciga hal cunug qoyskiiba waxay sababtay in 300 oo milyan oo ilmood laga soo rido uurka hooyadood, kuwaas oo badidood qasab ahaa, tiro aan la aqoon oo gabdho ah ayaa la nolol xabaalay, waxaana jira basaasyo dawladda u shaqeeya oo goob walba ku sugan. Qian iyo Xu waaga ayaa ku baryay, talana waa ku caddaatay. Qian uur ayey qaaday. Ma oga ilmaha uurka ku jira inuu gabadh ama wiil yahay, micnana maleh wuxuu yahay, haddii la ogaado waa laga soo ridayaa. Lamaanaha waxay go’aansadeen marka Qian dhasho iney cunuga banaanka dhigaan—iyagoo rajo ka qaba in dad kale ey heli doonaan oo siin doonaan nolol wanaagsan.

Lamaanaha Qian iyo Xu, dadaalkoodii badnaa wuu mira dhalay, oo noloshooda wey u kala kacday. Waxay iminka leeyihiin dukaan weyn oo lagu iibiyo qalabka koronatada ku shaqeeyay sida; muuqbaahiyaha, feerada, raadiyaha iyo qasaaladaha.

Dhanka kale Kati (Jingzhi) waxay jirsatay 10, sanadkuna waa 2005tii. Sida ballanta aheyd, labadii waalid waxay tageen Buundada Jaban, iyagoo rajo ka qaba, reerka gabadhooda qaatay iney ballanta oofin doonaan, oo ey gabadhooda markale la midoobi doonaan. “waxaanu tagnay Buundada aroor hore, waxaanu xanbaarsaneyn boor weyn kaas oo aan ku qornay magaca gabadheena iyo erayo u dhow tii aan farriinta gabadheena ku qornay. Waxaan ku ordaynay gabadh walba oo aan aragno oo buundada maraysa, annagoo isleh waa gabadhiinii” ayuu yiri Xu. “waxay aheyd xaalad qaraar” ayuu raaciyay Xu. Yeelkadeed, cidna lama kulmin, waxay buundada isaga carraabeen gabal dhicii—iyagoo gaajo, haraad, daal iyo niyadjab bastood la ah.

Dhanka kale qoyskii Mareykanka ahaa ee Kati qaatay, waxay saaxiib Shiinaha jooga ka codsadeen iney tagto buundada oo eegto labadii waaalid ee Kati haddii ey buundada yimaadeen. Ken wuxuu yiri: “waan xusuusannay ballanta 10ka sano, balse ma aanan doonayn Kati oo 10 jir ah inaan arrintaan soo dhexgelinno. Saaxiibad Shiineys ah ayaan ka codsanay iney tagto buundada—haddii ey labada waalid aragtana naga gaarsiiso in Kati nolol fiican ku nooshahay eyna heysato reer jecel. Nasiibdarro saaxiibka laga codsaday inuu balata tago wuusoo daahay, wuxuuna buundada tagay daqiiqado kadib markey labada waalid-dhiig ee Kati ey halkaas isaga ruqaansadeen”.  

Nasiib badni aawadeed, Xu waxaa si lama filaan ah sawir uga qaaday sawirqaade u shaqeeya TV-ga CCTV kaas oo barnaamij ka duubayay Buundada Jaban. Sawirka waxaa kasoo muuqday Xu oo kor u haya boor ey ku qoran tahay magaca gabadhiisa uu baadigoobayo iyo farriintii uu saladda u geliyay. Warbaahinta Shiineyska ayaa dhanka wanaagsan u qaaday xanuunka aabaha baadigoobaya gabadhiisa, waxayna bilaabeen barnaamijyo ey ku baafinayaan Kati. Saaxiibkii shiineyska ahaa ee qoyskii Mareykanka soo wakiisheen ayaa warbaahinta lasoo xiriiray, taas oo sawiro keentay. Labada waalid waxay markii ugu horreysay arkeen sawirka gabadhooda ey duruuftu ku qasabtay iney xooraan. Yeelkadeed, nasiibdarro, saaxiibkaan ayaa muddo kadib telkiisa bedeshay, deedna labadii qoys wey kala lumeen. Labadii waalid oo faraxsanaa waxaa soo wajahay niyadjab kale.

Waxay maalmaha iyo habeenadu isku beddelaan bilo, biluhuna ey noqdaaan sanado, sanado kadib, markey Kati weynaatay; ayey waalidiinteeda Mareykanka waxay weydiisay sida ey Shiineys ugu ekaatay. Wadahadallo dheer kadib waxay u sheegeen iney kasoo qaateen xarun agoomada oo ku taal Shiinaha, eyna garanayaan labadeeda dhiig-waalid. Waxay la xiriireen wariye filimada sameeyay oo Shiinaha caan ka ah kaas la yiraahdo Chang. Change qisada ayuu akhriyay, wuxuuna go’aansaday inuu filin ka duubo si qarsoodi ah, uuna Kati iyo labadeeda dhiig-waalid uu ku mideeyo buundada maalinta ey 22 jirsato.

Xu iyo xaaskiisa Qian sida caadada u aheyd sanadwalba maalinta ku beegan dhalashada gabadhooda ayey waxay tagaan Buundada Jaban—iyagoo rajo ka qaba iney gabadhooda timaaddo. Filin qaade Chang ayaa waxaa uusoo kaxeeyay Kati, wuxuuna si lama filaan ah u keenay Buundada Jaban—halkaas oo ey labadeeda dhiig-waalid ey kor u hayaan boor ey ku qoran tahay magaceeda. Meeshii ayaa waalidkii iyo gabadhooda ey isku soo boodeen—oo—isku booyeen ilaa gabalku ka dhaco. Kati waxaa loosoo galbiyay guriga labadeeda waalid halkaas oo ey kula kulantay markii ugu horreysay walaasheed-dhiig ee ka weyn, taas oo daardeed Kati loo dhalay.

Kati waxay tiri: “wixii ugu horreeyay ey igu yiraahdeen waxay ahey aheyd, ‘caato ayaad tahay, waa inaad wax cuntaa’. Intaan la joogay, gacantooda ayey cuntada igu siin jireen. Waxaan umaleynayaa iney aad ugu faraxsan yihiin aragayga, aadna iigu xiiseen”.

Dhanka kale labadeeda waalid-dhiig waxay yiraahdeen: “xiriir wanaagsan lama lihin gabadheena, sababtoo ah af-Ingiriis kuma hadalno, iyadana Mandariin kuma hadasho. Waxa kaliya ee aan nafteena u sheegi karnaa oo ey nagula muuqataa waa sidii gabadh nalaga guursaday, oo ku mashquulsan saygeeda iyo caruurteeda”.