Vince Focarelli (Cabdisalaan)

Wuxuu ka badbaaday 6 shirqool oo la doonayay in lagu khaarajiyo, waxaa la dhaawacay dhowr jeer, waxaa jirkiisa laga soo bixiyay xabado dhowr ah. Waxaa la dilay wiilkiisa curadka ah. Weligii hal habeen hal meel ma seexan, weligii hurdo ma ladin oo dhowr saac oo isku xigta ma hurdin. Waxaa isku si u ugaarsanayay Policeka iyo kooxo mooryaan ah oo ey is hayeen. Waxaa xabsiga la dhigay dhowr jeer. Wuxuu ahaa hogaamiyaha koox mooryaan ah oo daroogada iibisa, kooxdiisa waxay ahaan jireen kooxda loogu cabsi badan yahay dunida. Waxaa bishii soo geli jirtay boqolaal milyan oo doolarka Mareykanka ah. Waxaa u shaqeeyn jiray boqolaal mooryaan ah oo aad u hubeysan. Shaqaalihiisa waxaa kamid ahaa; rag darajo sare ka gaaray Policeka, gar-yaqaanno, policeka dabagalka ku takhasusay, xubno ku jira golaha shacabka iyo qaarkaloo badan.

Wuxuu ku dhashay dalka Talyaaniga, waxay waalidkii usoo hijroodeen dalka Austraalia halkaas oo uu ku barbaaray. Wuxuu ka dhashay qoys dan yar ah, labadiisa waalid waxay kala shaqeyn jireen labada gelin saacado dhaadheer waqtina umaba hayn inankooda yar. Wuxuu tagi jiray uskuul, laakiin maalmo wuu goyn jiray si uu shaaricyada ugula ciyaaro ciyaal sidiisoo kale ahaa. Maadaama labadiisa waalid ey ku mashquuleen shaqo –waxaa wehel u ahaa ciyaalka daroogada iibiya. Maalin maalmaha kamid aha ayaa waxaa arkay nin ahaa hogaamiyaha koox mooryaan ah oo doroogada iibisa, wuxuu la yaabay geesinimada iyo dhiiranaanta inankaan yar iyo sida ciyaalka da’diisa ahi ey uga baqayaan. Deedna wuu u yeeray wuxuuna ku yiri; ma doonaysaa inaad kamid noqoto kooxdayda oo aad lacag sameyso? Wuxuu inankii yaraa ku jawaabay haa. Sidii ayuu uga mid noqday kooxdii daroogada iibin jirtay.

Waalidkii ayaa durbadiiba dareemay in wax kusoo kordheen inankooda –kadib markeey ku arkeen isagoo dhar iyo waxyaabo cusub xidhan, waxay kaloo ku arkeen xirmooyin lacago ah. Waalidkii wey canaanteen, inankii yaraa canaantii ayuu qaadan waayay wuxuuna go’aansaday inuu u sheego hogaamiyihii kooxdan mooryaanta ah, hogaamiyihii ayaa ku yiri dhib malaha oo hoo furahaan oo qolkaas iyo waxa ku jiraa adigaa iska leh, laakiin shaqada haka seexan waa inaad si wacan u shaqaysaa. Sidaas ayuuna labadiisa waalid uga soo tagay.

Yeelkadeedee, waxay giraantu sidaa u wareegto, oo uu inankii yaraa ugu jiro daroogo la iibinayo iyo la dagaalanka kooxaha kale ee daroogada, iyo waliba ka badbaadida ugaarsiga ciidamada Policeka –wuxuu noqday gacanta midig ee hogaamiyaha kooxdiisa. Waxay indhihiisa haleeleen indhaha inanta kaliya uu dhalay hogaamiyaha kooxda. Wuxuu la haasaaweeyo oo hadba ubax iyo hadiyo qaali ah uu siduu roobkii ugu rusheeyo inanta –wuxuu hantiyay qalbiga qalanjadii uu dhalay hogaamiyaha kooxda. Hogaamiyaha kooxda wuxuu awlaad ka lahaa inantaas oo qudha, wuxuu ogaa inuusan muddo dheer sii noolaaneyn, sababtoo ah; cadowgiisa oo badan oo afarta beenaj habeen iyo maalin ey kasoo weerarayaan iyo isaga oo qabay cudurka kansarka. Wuxuu aad ugu farxay in inankii yaraa uu shaarica kasoo qaatay oo isagu in badan uusoo koriyay inuu inantiisa uu saaxiib la yahay, wuxuuna go’aansaday inuu u dhigo aroos aan Australia mid lamid ah aan weligeed lagu dhigin.

Hogaamiyaha wuxuu aad ugu farxay inuu inantiisa u helay wehel uu aad u yaqaan oo uu ku kalsoon yahay, maadaama uu hantidiisa oo dhan uu uga tagi doono inantiisa. Aroos ey malaayiin doolar ku baxday ayaa loo dhigay labadii is-calmatay, hogaamiyihiina markaan aad ayuu u faraxsan yahay.

Waxa ey maalmaha iyo habeenadu isweydaarsadaanba, inantii uur ayeey qaaday, muddo yar kadibna waxay dhashay wiil. Hogaamiyihii kooxda ayaa aad ugu farxay in ilmo uu awoowe u yahay dunida kusoo biiraan. Maalin maalmaha kamid ah ayuu hogaamiyaha kooxda uu si darran u xanuunsaday, deedna isbitaalka ayaa la dhigay, intuu isbitaalka ku jiray ayuu hantidiisa oo dhan ku wareejiyay inantiisa, shaqadiisiina wuxuu u magacaabay inanka uu soddoga u yahay – wuxuuna sidaas u sheegay dhamaan xubnaha kooxda. Waxyar kadib hogaamiyihii wuu geeriyooday – shaqadiina waxaa si rasmi ah ula wareegay inankuu soddogga u ahaa.

Xaaal wuxuu sidaas ahaadaba, hogaamiyihii cusbaa wuxuu galay dagaalo badan oo is daba joog ah iyo isa rasaaseyn joogto ah. Cadowgiisa ayaa batay, oo qaar kooxda ka tirsanaa ayaa iminka nacab u qaaday, maadaama uu isku dhexlay inantii hogaamiyaha iyo hantidiisiiba. Inankiisii ayaa weynaaday oo noqday mid garab istaagi kara aabihii. Maalin maalmaha kamid ah ayaa koox mooryaan ihi ey fooda is dareen, judhiiba waxay rasaas wadnaha kala heleen inankii hogaamiyaha oo aan meeshaba laga soo rogin, hogaamiyihiinna waa dhaawaceen. Markuu tacsidii inankiisa uu kasoo faaruqay isaganna uu ka biskooday dhaawicii soo gaaray, ayuu dardar geliyay inuu ugaarsado raggii inankiisa dilay. Iska horimaadyo badan oo uu ku dhaawacmay dhowr jeer, ayaa maalin maalmaha kamid ah waxaa si kadis ah gacanta ku dhigay ciidamada Policeka, maxkamadeyn kadibna waxaa la dhigay jeelka.

Yeelkadeedee, xabsiga ayuu ku helay waqti uu hurdo ku lado oo kaligii khalaaweeyo –maadaama qol kaligii lagu xiray. Wuxuu ka fikiray nolosha dheereenaysa uu saaran yahay, iyo waxa ka qaldan. Miiska qadada ee maxaabiista ey isugu yimaadaan ayeey isku barteen dhalinyaro Muslimiin ah, wuxuu arkay dhalintaannu iney ka duwan yihiin maxaabiista kale. Wuxuu bilaabay inuu dhalinyaradaas dabagalo oo ogaado waxay sameeyaan iyo waxay yihiin. Markuu dhowr cisho si dhow ula socday xaalka dhalintaan ayuu wuxuu arkay, in dhalintaannu yihiin dad muslimiin ah oo Allahood caabuda. Wuxuu go’aansaday inuu saaxiib la noqdo oo raggaan ka agdhowaado. Dhalintii waa soo dhoweeyeen waana aqbaleen waxayna bilaabeen iney diinta baraan. Muddo waxay xaalkiisa sidaas uu ahaadaba, wuxuu go’aansaday inuu islaanimada qaato wuxuu ku ashahaatay xabsiga dhexdiisa iyo dhalinyaradaas hortooda. Waxaa durbadiiba diinta soo galay rag badan oo asxaabtiisa ahaa.

Ninkaasi waxaa la oran jiray Vince Focarelli wuxuuna ahaa hogaamiyihii gaangistarada loo yiqiin ‘the bikes’ maadaama ey mooto wax ku weerari jireen – haddana wuxuu la baxay Cabdulsalaam.

Wuxuu yiri; “maanta waxaan ka xoroobay wax walba oo aan u malaynayay xoriyad, xoriyadda dhabta ah waa inaad ka xorowdaa adduunyada”

Cabdulsalaam wuxuu ku dhowaaqay inuu cafiyay dhamaan dadkii dhibta kala dhexeeysay oo ey ku jiraan raggii dilay inankiisa. Cabdulsalaam haatan waa hantiilaha maqaaayad iibisa cunnada xalaasha ah.