QALANJO LUGO DHEER IYO WIILKII FAKHRIGA AHAA (2) [SHEEKO JECEYL]

QALANJO LUGO DHEER IYO WIILKII FAKHRIGA AHAA (2)

[SHEEKO JECEYL]

Weligey danbe ma arkayo Rooble, jeceylkayga! Jeceyl aan laguula ogeyn dhib badanaa, ooraahyadaas ayaa Qalanjo maskaxdayda ka guuxayay. Waxaa xusid mudan in Qalanjo inan yar aheyd—oo aan guur gaarin amaba waxba ka aqoon guur. Jeceylka ey Rooble yare u qaadday waxaa xiliigaas lagu fasiri karaa oo qudha inuu ahaa naxariis iyo dareen ey dareemaysay sidey u xanuun badan tahay agoonimada, iyo noolaanshaha aabe iyo hooyo la’aan, maadaama ey iyada laftigeeda aheyd agoon. Balse, Qalanjo oo eegeysa Rooble sawirkiisa waxay tiri: waxaan ku jeclaaday maalintii ugu horreysay ey indhahaygu ku qabteen.

Kuguma jeclaan inaad agoon tahay, balse waxaan kugu jeclaaday sida aad u faraxsan tahay oo marwalba aad u dhoola caddeyneysid—adigoo agoon ah oo aan heysan cid ku kafaallo qaadda. Sidoo kale, waxaan kuugu jeclaaday sida aad uga dhex muuqatid caruurta kula midka ah, haddey noqon laheyd farxad, bashaashnimo; xataa markaad banooniga dheeleysid waad ka dhex muuqataa caruurta kale. Marwalba aan xerada imaado waxaan jeclaa inaan kuu imaado oo kula sheekeysto, kula ciyaaro—oo farxadda kula wadaago. Balse, waxaan ahaa nacasad, ma awoodin xataa inaan hortaada istaago. Waxaas oo bahdil ah waxaa ii keenay qalbigeyga doqonka ah, oo aan sinnaba u degeyn inuu ku arko mooyee.

Waxa kaliya aan qalbigeyga ku sasabay waa qoridda waraaqo jeceyl oo aan adiga kuu qorayay, balse, aanan awoodin inaan kuusoo diro. Marwalba waxaan qoraa hees ama geeraar aan adiga kuu tiriyay, markaan damco inaan kuusoo diro waan awoodi kari waayaa. Ma dooneyn inaan sii ahaado kafaallo qaadahaaga sirta ah, waxaan habeen walba ku seexdaa inaan aroortii ku dhowaaqo jeceylkayga oo kula wadaago qisadayda, balse, goortuu waaga baryo ayaan is iraahdaa, ka waran hadduu kaa jajabiyo ama qalbigaaga dhaawaco? Deedna waxaan go’aansadaa inaan dib u dhigo. Sidaas aawadeed ayaan diyaarad usoo qaatay si aan arrinkaan kuula wadaago. Adigana waxaad iigu jawaabtay jeesjees iyo bahdilaad. Qalbigeyga waa mid dhaawacan oo rajadii uu lahaa god madow ay sii galeyso, iima muuqato ififaalo igu dhiirigelineysa inaan doonista qalbigaaga ku guuleysan doono. Ma aqaan sidaan isaga indha tiri lahaa inaadan i jecleyn oo aad qofkale nolosha la wadaagi rabto, waan isku dayey inaan is ilaawsiiyo dareenka aan kuu qabo, waxaan na dhexmaray aniga iyo qalbigeyga dagaal culus, wuu iga diidan yahay inaan xakameeyo, qalbigeyga madax adeeg wuxuu rabaa inuu ku jeclaado, kasokow wax walbo aan u sheego. Anigu sidaan kuma sii jiri kari.

Ugu danbeyntii iyadoo ilmadii iyo diifka isku dartay ayey waxay ku luuqeysay geeraar uu tiriyay Allaha ha unaxariistee abwaan Cabdullaahi Nuuradiin. Abwaanku wuxuu yiri:

Nimuu caashaq dhiibay baan ahay oo ciillan waligiiye 


Anigoo carruuruu i galay cudurka shaydaane


Culays buu i saaray iyo xanuun caadi yoon bi'ine


Cabsi kama qabayn maalmuhuu igu cusboonaaye


Ciduun baa dawayn baan is iri, ciirsi kuu baxa'e


Cashar ii qora yaan lahaa culumo duub wayne


Ceesaamo gowracay intaan ciid ka faashadaye


Cishriin bilood baan ku jiray weel ciriiri yahe


Welina caafinaad ma ledin oo waygu caynkiiye


Intuu ii carooduu dhammaan cunay dubkaygiiye


Casho iyo quraac buu ka dhigay cudadahaygiiye


Cadkii waa ka feensaday laftii coodi iyo jiire


Ciriqyadii wadnaha buu xiroon dhiigga celinayne


Naftana waygu caascaasiyo, ceeshkii iga gooye


Caanana kollay ku tahay dhadhamo wayga celiyaaye


Cunahaba wixii sii maraa waa candhuufada'e

Cagtaydii tallaabada gabtoo caajis baan ahaye


Sidii ruux cirroola ah yaan tukubo culus ku ruugaaye


Cirba-jeedis mooyee durduro waan ka caal-dhigaye


Waxbase yaan calaacalin dad waa kii calool adage


Midkii cudurkan igu beeray baa ii cadaawa ahe


Anigaa naftaydii casilay caadil ii qoraye

Cudur iga fog baan doontay oon caabuq ii harine


Middii calanka loo saaray baa cayrisoo dhimaye


Inuu caashaq rageed dilaan cidina moogayne


Aniga halkaan caawa aal ciribla' weeyaane


Ka carraabay dunidoo naftani waygu ciribriiqe


Noloshii cirkay iga tagtay iyo caadka hoos mara'e


Cisraa'iil wuxuu igu wadaa ceelkii aakhiro'e


Teer iyo carruurnimo midkaan daba cataabaayey


Haddii uu i caawini lahaa cudur ma jiifeene


Cidlada iyo jirradu waa dartii caawa aan qabo'e


Qoftii caashaq rageed qabtooy, xiro calooshaada!

FG: gabayga waxaa loo tiriyay gabadha, aniga waxaan ka dhigay in wiil loo tiriyay si ey ula jaanqaaddo sheekadeena.

Abdiaziz Arab